مجموعة من أغاني فيروز
رأي الشباب قائمة المنتديات شارك
س و ج ابحـث قائمة الاعضاء المجموعات الملف الشخصي ادخل لقراءة رسائلك الخاصة دخول
أحدث المواضيع » طيور جدتى قصة قصيرة جدا تاليف/صادق ابراهيم صادق  || عدد الردود [ 0 ]    .::.     » بصيص أمل  || عدد الردود [ 0 ]    .::.     » FW: صوت من أنتهك حقوق الانسان في غزة!!!!!‎  || عدد الردود [ 0 ]    .::.     » فتاة احلامى قصة ق تاليف /صادق ابراهيم صادق  || عدد الردود [ 0 ]    .::.     » القضية الفلسطينية ناجي ناجي  || عدد الردود [ 2 ]    .::.     » فلسطــين جــرحـــي وغـــزة الــــدواء  || عدد الردود [ 2 ]    .::.     » دعوة للتغيير  || عدد الردود [ 2 ]    .::.     » نرجوا المشاركة (شبكة الشباب الحر  || عدد الردود [ 0 ]    .::.     » زوج حذاء وشتائم تودع بوش في العراق  || عدد الردود [ 1 ]    .::.     » حفلات مارسيل خليفة في سورية  || عدد الردود [ 0 ]    .::.    

  .::. .::. .::. .::. .::.

مجموعة من أغاني فيروز

القائمة
المقالات العامة
مواضيع اجتماعية
مقالات من مصادر أخرى
صفحة أدبية و فنية
  محمود درويش
  أحمد فؤاد نجم
  أغاني مارسيل خليفة
  أغاني فيروز
شخصيات هامة
 
 
مؤلف مقال
خالد
المشرف العام
المشرف العام


اشترك في: 13 مايو 2004
مقالات: 73
تعليقات: 0
المكان: سوريا
 ارسل: الاثنين اغسطس 14, 2006 1:21 am

كلمات مجموعة من أغاني فيروز - الأخوين رحباني


أنا عندي حنين


أنا عندي حنين ما بعرف لمين
ليليي بيخطفني من بين السهرانين
بيصير يمشيني لبعيد يوديني
تا أعرف لمين و ما بعرف لمين
عديت الأسامي و محيت الأسامي و نامي يا عينيي إذا راح فيكي تنامي
و بعدو هالحنين من خلف الحنين الحنين بالدمع يغرقني و بأسامي المنسيين
تا أعرف لمين و ما بعرف لمين
أنا خوفي يا حبي لتكون بعدك حبي و متهيألي نسيتك و أنتا مخبى بقلبي
و بتودي الحنين ليليي الحنين يشلحني بالمنفى بعيونك الحلوين
تا أعرف لمين و ما بعرف لمين



فايق يا هوى


فايق يا هوى لم كنا سوى و الدمع سهرني وصفولي دوا تاري الدوا حبك و فتش عالدوا
فايق لما راحوا أهلنا مشوار تركونا و راحوا قالوا ولاد زغار
و دارت فينا الدار و نحنا ولاد زغار و الهوى جمعنا و فرقنا الهوى
طير المسا جايي من سفر طويل و على باب السهرة تبكى المواويل
منطفي القناديل و تبكي المواويل و نسهر عالعتمي تنينتنا سوى
فايق عا سهرة و كان في ليل و ندي و النار عم تغفا بحضن الموقدي
و العتوبي مسافرة و ما في كلام و لا في هدى قلبك و لا قلبي هدي
و نام الحكي و الناس و انهد السراج و تكت خصور الورد عا كتف السياج
و فل القمر عا ضيعتو و فلو الدراج و قلك بقاش بكير و تقلي اقعدي



أنا لحبيبي


أنا لحبيبي و حبيبي إلي
يا عصفورة بيضا لا بقى تسألي
لا يعتب حدا و لا يزعل حدا
أنا لحبيبي و حبيبي إلي
حبيبي ندهني قلي الشتي راح
رجعت اليمامة زهر التفاح
و أنا على بابي الندي و الصباح
و بعيونك ربيعي نور و حلي
و ندهني حبيبي جيت بلا سؤال
من نومي سرقني من راحة البال
و أنا على دربو و دربو عالجمال
يا شمس المحبة حكايتنا أغزلي



يا طير / يا حجل صنين


يا طير يا طاير على طراف الدني
لو فيك تحكي للحبايب شو بني
يا طير و اخد معك لون الشجر
ما عاد في الا النطرة و الضجر
بنطربعين للشمس عبرد الحجر
و ملبكى و إيد الفراق تهدني يا طير
و حياة ريشاتك و إيامي سوا
و حياة زهر الشوك و هبوب الهوا
ان كنك لعندن رايح و جن الهوا
خدني و لنو شي دقيقة و ردني يا طير
يا حجل صنين بالعلالي يا حجل صنين بالجبل
خبر الحلوين على حالي خبر الحلوين يا حجل
يا حجل عالمي أنت و رايح زور هاك الحي رايح رايح
و جيب خصلة في عالجوانح و سهرنا عالمي يا حجل



فايق علي


فايق علي فايق علي
نحنا اللي كنا بهيك العلية
نبقى نقعد بالقناطر وقت الشتوية
من زمان و زمان نحنا كنا جيران
تبقو تيجو لعنا نقعد سوا و نتمنى
و نصور عالحيطان و نقولك يا شيطان وقعت المزهرية
بعدتنا الطريق عن الطريق العتيق
مدري كيف ألتقينا صدفة و ضحكو عينينا
ضحكت عالحيطان صورنا من زمان صبي ناطر صبية



يا جبل للي بعيد / بعدو الحبايب


يا جبل اللي بعيد خلفك حبايبنا
بتموج متل العيد و همك متعبنا
إشتقنا لمواعيد بكينا تعذبنا
يا جبل اللي بعيد قول لحبايبنا
بعدو الحبايب بيعدو بعدو الحبايب
عجبل عالي بيعدو و القلب دايب
بعدو الحبايب بيعدو بيعدو
دبلو الزهور و بين هالسجرات في طيرين
عم يسألو لوين هالأصحاب راحو لوين
شوفو الموائد رمدو رمدو
قلتلهم يا مين عالحلوين يسأل مين
ما تذكرو و تخمين صارو هيك غدارين
مع غيرنا رح يسعدو يسعدو



يا قلبي لا تتعب قلبك


يا قلبي لا تتعب قلبك و بحبك على طول بحبك
بتروح كتير بتغيب كتير و بترجع عادراج بعلبك .. يا قلبي لا تتعب قلبك
ماشي و القمر ماشي تبعت مراسيل
يا قلبي المتل فراشي حول القناديل
لا بتعرف وهج النار و لا بتكفي المشوار
و ملبك بالحب ملبك و تروح و ترجع عابعلبك
أنا مين اللي صحاني من عز النوم
و صوب عيونك وداني من أول يوم
أنا مين و إنتا مين يا نحنا المنسيين
و دربي بعدني عن دربك أه و إندهلك يا حبيبي بحبك



بقطفلك بس


بقطفلك بس هالمرة هالمرة بس عا بكرا عا بكرا بس شي زهرا شي زهرا حمرا و بس
و لا بدي شي بعد الا داريك بيتي بيصير وعد لما بحاكيك
يا ويل عيوني كيف بتندهلك متل المجنونة بتصير تقلك
بحلم و بضل شهر بالي مشغول بيطلعلي قول شعر ما بعرف قول
بتذكر مرة سهرنا بخيمة و بهاك السهرة وشوشتك كلمة



لا أنت حبيبي


لا أنت حبيبي و لا ربينا سوى
وقصتنا الغريبي شلعها الهوى
و صرت عنك غريبي انساني يا حبيبي
امبارح تلاقينا قعدنا عاحجر
برد و حوالينا عريان السجر
خزقنا الصور و محينا القمر
ردتلو مكاتيبو و ردلي مكاتيبي
كل من طوي شراعو و راح بهالمدى
ولدين و ضاعوا عاجسر الصدى
تفرقنا بهدا و الدنيي هدا
بخاطري صليلي تسعد يا حبيبي



يا حلو شو بخاف


يا حلو شو بخاف أني ضيعك
نمرق على الجسر العتيق
و تروح مني بهالطريق
لوين ما تقلي و لا تاخدني معك
يا حلو شو بخاف أني اسالك
كنو بعد بتحبني
قد البحر قد الدنيي
بفزع لتضجر من سؤالي و زعلك
يا حلو شو بخاف ليله عاصفة
يخطر عابالك شي نجم
و تقوم تمشي بهالعتم
و أنطر أنا عالباب أنطر خايفة
ساعة اذا مرقت و ما شفتك فيا
شوف شوف حالي زغيرة
وحدي بهوني قنطرة
و عالدنيي ينزل ضباب و يمحيا
اعملني متل خاتم دهب بأصبعك
تركني حاكيك و اسمعك
خدني على قلبك معك
دخلك بخاف اني ضيعك .. يا حلو



بعدك على بالي


طل و سألني اذا نيسان دق الباب
خبيت وجيي و طار البيت في و غاب
حبيت افتحلو عالحب اشرحلو
طليت ما لقيت غير الورد عند الباب
بعدك على بالي يا قمر الحلوين
يا زهرة بتشرين يا دهبي الغالي
بعدك على بابي يا حلو يا مغرور
يا حبق و منتور على سطح العالي
مرق الصيف بمواعيدو و الهوى لملم عناقيدو
و ما عرفنا خبر عنك يا قمر و لا حدا لوحلنا بإيدو
بتطل الليالي و بتروح الليالي و بعدك على بالي



يا ريت


يا ريت أنت و أنا بالبيت
شى بيت أبعد بيت
ممحي ورا حدود العتم و الريح
و التلج نازل بالدنيي تجريح
يضيع طريقك ما تعود تفل
و تضل حدي تضل
و يزهر و يدبل ألف موسم فل
و تضل حدي تضل حدي تضل
و ما يضل بالقنديل نقطة زيت



يا قمر على دارتنا


يا قمر على دارتنا يا حكاية سهرتنا يللي فتنتنا حلوة يا جارتنا
يا قمر على دارتنا عتلالك ليلتنا رقصة حملتنا و صوبك أخدتنا
شفناك ميلنا بهالليل و سألنا
تاريك حاببنا و ما بتقول شو زعلنا
و القمر على دارتنا حكاياتو بسهرتنا رقصة حملتنا و صوبو أخدتنا



أمي يا ملاكي


أمي يا ملاكي يا حبي الباقي الى الأبد
و لا تزل يداك أرجوحتي و لا أزل ولد
يرنو إلى شهر و ينطوي ربيع
أمي و أنت زهر في عطره أضيع
و إذ أقول أمي أفتن بي أطير
يرف فوق همي جناح عندليب
أمي يا نبض قلبي نداي إن وجعت
و قبلتي و حبي أمي إن ولعت
عيناكِ ما عيناكِ أجمل ما كوكب في الجلد
أمي يا ملاكي يا حبي الباقي إلى الأبد

يا حبيبي كلما هب الهوى


يا حبيبي كلما هب الهوى و شدا البلبل نجوى حبه
لفني الوجد و أضناني الهوى كفراش ليس يدري ما به
صغ لقلبي يا حبيبي حلما من سنا الصبح و غدو الغلس
لمني من وحشة العمر كما لمت النسمة عطر النرجس
يا زمان الحب هل رجع الى عهدنا و الروض زهر يبسم
ننهب الفرصة و الليل حلا بالأغاني و دعانا الموسم
يوم جئناه فأبدا سقم و تهادى بحرير الملبس
أشرقت عيناه سحراً مثلما يشرق الصبح بيومٍ مشمس



سكرو الشوارع


سكروا الشوارع عتموا الشارات
زرعوا المدافع هجروا الساحات
وينك يا حبيبي بعدك يا حبيبي
صرنا الحب الصارخ صرنا المسافات
إشتقنا للإيام السعيدي
إيام السهر عالطريق
عجقة سير و مشاوير بعيدي
و نتلاقا بالمطعم العتيق
يا هوا بيروت يا هوا الإيام
إرجعي يا بيروت ترجع الإيام
إجا الصيف التاني و القمر مكسور
قولك رح تنساني يا حبي المقهور
رجعت على بيتي ما لقيتو لبيتي
دخان و زوايا لا وردي و لا سور
عم بيروحوا متل رفوف سنونو
تحت نجوم الليل مشردين
قولك الأصحاب وين بيكونوا
وين بيكون الدمع و الحنين



خدني


خدني على تلات هالحلوين
خدني على الأرض اللي ربتنا
إنساني على حفاف العنب و التين
إشلحني على ترابات ضيعتنا
بواب العتيقا عم تلوحلي
و صوت النهورا ينده الغياب
و عيون عاشبابيك تشرحلي
صحاب عم بتقول نحنا صحاب
و إمشي على طرقات منسيي
دنية غياب و رح يبيت الطير
أنطر شي إيد تسلم عليي
شي صوت عم بيقول مسا الخير
خدني إزرعني بأرض لبنان
بالبيت يللي ناطر التلي
إفتح الباب و بوس الحيطان
و إركع تحت أحلى سما و صلي



لملمت ذكرى لقاء الأمس


لملت ذكرى لقاء الأمس بالهدب و رحت أحضرها في الخافق التعب
أيدي تلوح من غيب و تغمرني بالدفء و الضوء بالأقمار بالشهب
ما للعصافبر تدنو ثم تسألني أهملت شعرك راحت عقدة القصب
رفوفها بريق في تلفتها تثير بي نحوها بعضا من العتب
حيرى أنا يا أنا و العين شاردة أبكي و أضحك في سري بلا سبب
أهواه من قال إني ما أبتسمت له دنا فعانقني شوق إلى الهرب
نسيت من يده أن أسترد يدي طال السلام و طالت رفة الهدب
حيرى أنا يا أنا أنهد متعبة خلف الستائر في أعياء مرتقب
أهوى الهوى يا هلا إن كان زائرنا يا عطر خيم على الشباك و انسكب



يا قمر على دارتنا


يا قمر على دارتنا يا حكاية سهرتنا يللي فتنتنا حلوة يا جارتنا
يا قمر على دارتنا عتلالك ليلتنا رقصة حملتنا و صوبك أخدتنا
شفناك ميلنا بهالليل و سألنا
تاريك حاببنا و ما بتقول شو زعلنا
و القمر على دارتنا حكاياتو بسهرتنا رقصة حملتنا و صوبو أخدتنا


سألوني الناس


سألوني الناس عنك يا حبيبي
كتبوا المكاتيب و أخدها الهوا
بيعز عليي غني يا حبيبي
و لأول مرة ما منكون سوا
سألوني الناس عنك سألوني
قلتلن راجع أوعى تلوموني
غمضت عيوني خوفي للناس
يشوفوك مخبى بعيوني
و هب الهوى و ما كان الهوى
لأول مرة ما منكون سوا
طل من الليل قلي ضويلي
لاقاني الليل و طفى قناديلي
و لا تسأليني كيف إستهديت
كان قلبي لعندك دليلي
و اللي إكتوى بالشوق إكتوى
لأول مرة ما منكون سوا


يا حرية


طلعنا .... حررنا
طلعنا على الضو طلعنا على الريح
طلعنا على الشمس طلعنا على الحرية
يا حرية يا زهرة نارية يا طفلة وحشية يا حرية
صرخو عالعالي على العالي اركضو بالحقالي على العالي
قولو للحرية نحنا جينا و افرحوا افرحوا
يا ليل يا حب يا دروب يا حجار الحقونا عالشجرة البرية
غيرو اساميكن اذا فيكن لونو عيونكم اذا فيكن
خبو حريتكم بجيابكم و اهربو اهربو
عالضو عالريح عالشمس عالبرد عبيادر مضويه و منسيه


الأوضة المنسية


ليل و أوضة منسية و سلم داير مندار
عليت فينا العلية و دارت بالسهرة الدار
و العلية مشتاقة عا حب و هم جديد
فيها طاقة و الطاقة مفتوحة للتنهيد
وضوية البيوت تنوس فانوس يسهر فانوس
و انت بقلبي محروس بزهر الحرقة و النار
يا ريت الدنيي بتزغر و بتوقف الأيام
هالأوضة وحدا بتسهر و بيوت الأرض تنام
و تحت قناديل الياسمين انت و انا مخبايين
نحكي قصص حلوين و لا مين يدري شو صار
يا أوضة زغيرة زغيرة فيها الحب تلاقيت
أوسع من دنيي كبيرة و أغلى من ميت بيت
تعبانة و بدي حاكيك حاكيني الله يخليك
نقلني عا شبابيك الليل و عسطوح الدار


سنرجع


سنرجع يوماً الى حينا و نغرق في دافئات المنى
سنرجع مهما يمر الزمان و تنأى المسافات ما بيننا
فيا قلب مهلآ و لا ترتم على درب عودتنا موهنا
يعز علينا غداً أن تعود رفوف الطيور و نحن هنا
هنالك عند التلال تلال تنام و تصحو على عهدنا
و ناس هم الحب أيامهم هدوء انتظار شجي الغنا
ربوع مدى العين صفصافها على كل ماء وهى فانحنى
تعب الظهيرات في ظلها عبير الهدوء و صفو الهنا
سنرجع خبرني العندليب غداة التقينا على منحنى
بأن البلابل لما تزل هناك تعيش بأشعارنا
و مازال بين تلال الحنين و ناس الحنين مكان لنا
فيا قلب كم شردتنا رياح تعال سنرجع هيا بنا



القدس العتيقة


مريت بالشوارع ... شوارع القدس العتيقة
قدام الدكاكين ... البقيت من فلسطين
حكينا سوى الخبرية و عطيوني مزهرية
قالوا لي هيدي هدية من الناس الناطرين
و مشيت بالشوارع ... شوارع القدس العتيقة
اوقف عباب بواب صارت و صرنا صحاب
وعينيهن الحزينة من طاقة المدينة
تاخدني و توديني بغربة العذاب
كان في أرض و كان في ايدين عم بتعمر تحت الشمس و تحت الريح
و صار في بيوت و صار في شبابيك عم بتزهر صار في ولاد و بايديهم في كتاب
و بليل كلو ليل سال الحقد بفية البيوت
و الايدين السودا خلعت البواب و صارت البيوت بلا صحاب
بينن و بين بيوتن فاصل الشوك و النار و الايدين السودا
عم صرخ بالشوارع ... شوارع القدس العتيقة
خلي الغنيي تصير عواصف و هدير
يا صوتي ضلك طاير زوبع بهالضماير
خبرهن عللي صاير بلكي بيوعى الضمير



في قهوة عالمفرق


في قهوة عالمفرق في موقدة و في نار
نبقى أنا و حبيبي نفرشها بالأسرار
جيت لقيت فيها عشاق اتنين زغار
قعدوا على مقاعدنا سرقوا منا المشوار
يا ورق الأصفر عم نكبر عم نكبر
الطرقات البيوت عم تكبر عم تكبر
تخلص الدنيي و ما في غير يا وطني
يا وطني أه بتضلك طفل زغير
متل السهم الراجع من سفر الزمان
قطعت الشوارع ما ضحكلي انسان
كل أصحابي كبروا و أتغير اللي كان
صاروا العمر الماضي صاروا دهب النسيان



عتاب


حاجي تعاتبني يئست من العتاب
و من كتر ما حملتني هالجسم داب
حاجي تعاتبني و إذا بدك تروح روح
روح و أنا قلبي تعود عالعذاب
علمت قلبي من الطفولي عاهواك
و ما تطلعت هالعين إلا عاحماك
و الله بيشهد ما ضحكت مرة لسواك
و ليش بتضلك تفتحلي بواب
عايشي بعيدي عن ليالي الصفا
عيشة جفا و بحكي مع الناس بجفا
يا هل ترى مش هيك بيكون الوفا
و كيف بيكون الوفا عطيني جواب
إن كان غيرة هالجدال و هالشكوك
أضنيتني يكفي بقى يرحم أبوك
و إن كان غيري حباب عم يعلموك
الله يباركلك يا ولفي بهالحباب
كل ما عم زيد في حبك ولوع
كل ما بتزيد بعيني الدموع
و يا ريت عن حبك المضني لي رجوع
رح تهرب الأيام و يمر الشباب
وين بتلاقي متل قلبي قلوب
شو صار صافيلك و غافرلك ذنوب
و قديش عن حبك قلت بكرا بتوب
ما تبت يا ولفي و لا هالقلب تاب


عودة العسكر - لا تخافي -


لا تخافي سالم غفيان مش بردان
نايم عا تلة بتضل تصلي و ناطر زهر اللوز بنيسان
بقلبو الإيمان و مغطى بعلم لبنان
بتتلج الدني بتشمس الدنيي و يا لبنان بحبك تاتخلص الدنيي
بحبك بعينيي و بقلك غنيي تلجك المحبي و شمسك الحريي
وطني يا حكايي بالعز مضوايي ليش هالقد بحبك يا غاية الغايي
بحبك يا عينيي لأنك غنيي تلجك المحبي و شمسك الحريي
و تضلك عالي و معمر و تضلك لبنان الأخضر
شعبك كلو جيشك كلو عاحدودك يوقفو العسكر



ميس الريم - حبو بعضن -


بيقولوا الحب بيقتل الوقت و بيقولوا الوقت بيقتل الحب
يا حبيبي تعا تا نروح قبل الوقت و قبل الحب
بديت القصة تحت الشتي بأول شتي حبو بعضن
و خلصت القصة بتاني شتي تحت الشتي تركوا بعضن
حبو بعضن ... تركوا بعضن
يا حبيبي شو نفع البكي شو إلو معنى بعد الحكي
مازالا قصص كبيري و ليالي سهر و غيري بتخلص بكلمي زغيري
حبو بعضن ... تركوا بعضن
و كانت القصة تحت الشتي بأول شتس حبو بعضن
و خلصت القصة بتاني شتي تحت الشتي تركوا بعضن
حبو بعضن ... تركوا بعضن



ميس الريم - كنا نتلاقى -


كنا نتلاقى من عشيي و نقعد على الجسر العتيق
و تنزل على السهل الضباب تمحي المدى و تمحي الطريق
ما حدا يعرف بمطرحنا غير السما و ورق تشرين
و يقلي بحبك أنا بحبك و يهرب فينا الغيم الحزين
يا سنين اللي رح ترجعيلي ارجيلي شي مرة ارجعيلي
و انسيني عاباب الطفولي تا أركض بشمس الطرقات
يا سنين اللي رح ترجعيلي ارجيلي شي مرة ارجعيلي
و رديلي ضحكات اللي راحوا اللي بعدا بزوايا الساحات
بتذكر شو حكيوا عليي لما نطرت و إنتا نسيت
و صار الشتي ينزل عليي و إجا الصيف و إنتا ما جيت


يابا لالا


يابا لا لا لا لا لا لا لا بتريد تحاكينا أو لا
يابا لا لا لا لا لا لا لا رح بترد علينا أو لا
يعني ما بتحبينا؟ لأ
و لابتحبي غنانينا؟ لأ
و لا رح بتردي علينا؟
لا يابا لا لا لا لا لا لا لا
يا طير يا طاير يا طاير صوب امجدايل
سلم و زيد السلام يابا سلم عالخصرا مايل
و إن شفت الحلوى الميالة العيونا عيون الغزالة
خبرها إنو منحبا و علينا لا تقشع حالا
يا طير يا طاير يا طاير صوب القمورة
سلم و زيد السلام يابا سلم عالحلوة و زورا
و إن شفتا زادت دلالا عللي بحبوا جمالا
قلا منهجرها منتركها لكن ما منعشق بدالا


يا جبل الشيخ


يا جبل الشيخ يا قصر الندي
و حبيبي بكير لعندك غدي
يا جبل الشيخ رباك الهوا
و حبيبي و أنا ربينا عالهوى
و يا جبل العالي لو تعرف بحالي
هديت رياحك و قلبي ما هدي
يمرقوا و بيروح من عنا القمر
و على البال تعن ايام الزغر
يا لون اليمامي و يا تفاح الشامي
تعزمنا منقلك رح نجي غدي


إسهار


إسهار بعد إسهار تايحرز المشوار
كتار هو زوار شوي و بيفلو و عنا الحلا كلو
و عنا القمر بالدار و ورد و حكي و أشعار بس إسهار
بيتك بعيد و ليل ما بخليك ترجع أحق الناس نحنا فيك
و رح فتح بوابي و إنده على صحابي
قلن قمرنا زار و تتلج الدنيي خبار بس إسهار
و النوم مين بينام غير الولاد
بيغفوا و بيروحوا و يلملموا أعياد
و مادام إنك هون يا حلم ملوا الكون
شو هم ليل و طار و ينقص العمر نهار بس إسهار


ناس من ورق - إذا الأرض مدورة -


ولما القمر غاب و تغرب الليل
تغربوا الأحباب كل واحد بميل
و إذا الأرض مدورة يا حبيبي
رح نرجع نتلاقى يا حبيبي
نتلاقي بالبيت بفي القنطرة
إذا يا حبيبي الأرض مدورة
التقييم: 0.00/5.00 [0]

جميع الاوقات تستعمل نظام GMT + 3 ساعة

انتقل الى:  
أنت لا تستطيع وضع مقالات في هذا القسم
أنت لا تستطيع تعديل مقالاتك في هذا القسم
أنت لا تستطيع حذف مقالاتك من هذا القسم
أنت لا تستطيع تقييم المقالات في هذا القسم


Powered by MX-System & phpBB © 2001, 2005 phpBB Group

مواقع صديقة : HPRLink Directory | استضافة و تصميم | HPRLink Blog | نساء سورية | الكاريكاتير السوري | Bahreya.com